Kryetarja Sinani zhvillon takim me Shefin e OSBE-së në Beograd, Jan Braathu: pasivizimi i adresave tema kryesore e takimit
Kryetarja e Komunës së Preshevës, Ardita Sinani, gjatë ditës së sotme ka zhvilluar një takim me shefin e Misionit të OSBE-së në Beograd, Jan Braathu.
Në këtë takim të zhvilluar në Beograd, si çështje kryesore u trajtua fushata e pasivizimit të adresave të qytetarëve shqiptarë në Luginën e Preshevës.
”Çështja e pasivizimit të vendbanimeve ishte tema qendrore që ngrita duke kërkuar nga Shkëlqesia e Tij, z.Jan Braathu ta përdor autoritetin e tij, për të raportuar në instancat vendimarrëse ndërkombëtare dhe republikane, mbi këtë proces, që në emër të ligjit, po eliminon administrativisht dhe juridikisht shqiptarët, nga qytetaria dhe shtetësia” – ka shkruar kryetarja Sinani pas takimit me Ambasadorin Braathu.
Gjithashtu në takim u bisedua edhe për mos-integrimin e shaiptarëve në institucione Republikane.
Më poshtë mundë të lexoni të plotë postimin e kryetares, Ardita Sinani:
Sot, pata nderin të mirëpritem në Beograd, nga Shefi i Misionit të Organizatës për Siguri dhe Bashkëpunim Evropian në Serbi, Ambasadorin Jan Braathu, të shoqëruar nga znj.Sarah Groen, Zv-shefe e misionit dhe znj.Agata Siemaszkiewicz, këshilltare për çështje politike dhe raportim.
Çështja e pasivizimit të vendbanimeve ishte tema qendrore që ngrita duke kërkuar nga Shkëlqesia e Tij, z.Jan Braathu ta përdor autoritetin e tij, për të raportuar në instancat vendimarrëse ndërkombëtare dhe republikane, mbi këtë proces, që në emër të ligjit, po eliminon administrativisht dhe juridikisht shqiptarët, nga qytetaria dhe shtetësia.
Çështjet e regjistrimit të popullatës, (mos)integrimit të shqiptarëve dhe të (mos)investimeve të fondeve publike nga qeveria republikane ishin disa nga temat kryesore të bashkëbisedimit.
Prania dhe angazhimi i Organizatës për Siguri dhe Bashkëpunim Evropian në Luginën e Preshevës mbeten të një rëndësie të veçantë për çështjet e sigurisë, zhvillimit dhe demokracisë.
