Kamberi në 31 vjetorin e PVD: “Ne po ecim, por na duhen edhe hapa më të mëdhenj në rrugëtimin tonë të përbashkët”

Me rastin e përvjetorit të 31-të të Partisë për Veprim Demokratik, kryetari i këtij subjekti politik, Shaip Kamberi, ka uruar anëtarësinë dhe simpatizantët e partisë më me përvojë në rajonin e Luginës së Preshevës.

Kamberi, në urimin e tij, ka falenderuar çdo votues veç e veç, për dhënien e mundësisë së prezentimit dhe bashkërrugëtimit për tre decenie me rradhë.

Ai nuk ka harruar pa e kujtuar edhe kohën e vështirë kur ky subjekt politik u themelua tre decenie më parë, si e vetmja mundësi për organizimin e shqiptarëve në tre komunat e Luginës së Preshevës.

“Për shqiptarët e përjashtuar nga përfaqësimi, të shtypur e shkelur, të arrestuar politikisht e të vrarë, nga sistemet që vrasjen për shqiptarët e kishin shndërruar në agjenda e politika shtetërore, nuk ka pasur rrugë tjetër, përveç asaj të organizimit. Prandaj atëkohë ishte guxim, ndërsa sot, organizimi politik i shqiptarëve të Luginës mbetet mjeti demokratik i përpjekjeve për realizimin e aspiratave politike të Luginës së Preshevës” – ka shkruar Kamberi.

Kryetari I PVD-së, ndër të tjera ka thënë se: “Tre decenie angazhim nuk janë pak edhe sikur gjithçka të shkonte mirë. Ato bëhen shumë kur i karakterizon beteja e pandalur politike, angazhimi i papushuar institucional e pengesat e shumta nga shumë faktorë. Nga brenda dhe jashtë” – ka shkruar ai.

Për më shumë, kryetari Shaip Kamberi ka kërkuar që kjo rrugë duhet të vazhdojë, dhe se angazhimi në PVD, nuk guxon ta lodhë askend, dhe nuk duhet ndaluar kjo rrugë.

“Por, kjo nuk duhet e nuk guxon t’na lodhë, ne nuk guxojmë të ndalemi. Ne po ecim, por na duhen edhe hapa më të mëdhenj në rrugëtimin tonë të përbashkët. E ecja jonë duhet të vazhdojë” – thuhet në durimin e kryetarit të PVD-së, Shaip Kamberi drejtuar anëtarësisë së partisë së tij.

Më poshtë, mundë ta lexoni të plotë urimin e kryetarit, Shaip Kamberi, drejtuar anëtarëve të PVD-së, me rastin e 31 vjetorit të partisë:

𝑶𝒓𝒈𝒂𝒏𝒊𝒛𝒊𝒎𝒊 𝒑𝒐𝒍𝒊𝒕𝒊𝒌 𝒊 𝒔𝒉𝒒𝒊𝒑𝒕𝒂𝒓𝒆̈𝒗𝒆 𝒕𝒆̈ 𝑳𝒖𝒈𝒊𝒏𝒆̈𝒔 𝒔𝒆̈ 𝑷𝒓𝒆𝒔𝒉𝒆𝒗𝒆̈𝒔 𝒊𝒔𝒉𝒕𝒆 𝒅𝒐𝒎𝒐𝒔𝒅𝒐𝒔𝒉𝒎𝒆̈𝒓𝒊 𝒆 𝒂𝒔𝒂𝒋 𝒌𝒐𝒉𝒆 – 𝑷𝒂𝒓𝒕𝒊𝒂 𝒑𝒆̈𝒓 𝑽𝒆𝒑𝒓𝒊𝒎 𝑫𝒆𝒎𝒐𝒌𝒓𝒂𝒕𝒊𝒌 𝒊𝒔𝒉𝒕𝒆 𝒃𝒂𝒓𝒕𝒆̈𝒔𝒆 𝒆 𝒔𝒂𝒋

Në 31 vjetorin e themelimit të Partisë për Veprim Demokratik dua të falenderoj çdo anëtar e anëtare, aktivist e aktiviste, udhëheqës të organeve të partisë, nga themelimi i saj e deri sot.

Dua t’i falenderohem çdo votuesi veç e veç, të cilët nga atëherë e deri më tash, kanë mundësuar që t’i përfaqësojmë e prezentojmë, t’i prijmë, t’i udhëheqim dhe të bashkërrugëtojmë.

Sepse pa ta, nuk do të ishte e mundur, e për ta ia vlenë.

Për shqiptarët e përjashtuar nga përfaqësimi, të shtypur e shkelur, të arrestuar politikisht e të vrarë, nga sistemet që vrasjen për shqiptarët e kishin shndërruar në agjenda e politika shtetërore, nuk ka pasur rrugë tjetër, përveç asaj të organizimit.

Prandaj atëkohë ishte guxim, ndërsa sot, organizimi politik i shqiptarëve të Luginës mbetet mjeti demokratik i përpjekjeve për realizimin e aspiratave politike të Luginës së Preshevës.

Tri decenie angazhim nuk janë pak edhe sikur gjithçka të shkonte mirë. Ato bëhen shumë kur i karakterizon beteja e pandalur politike, angazhimi i papushuar institucional e pengesat e shumta nga shumë faktorë. Nga brenda dhe jashtë.

Por, kjo nuk duhet e nuk guxon t’na lodhë, ne nuk guxojmë të ndalemi.

Ne po ecim, por na duhen edhe hapa më të mëdhenj në rrugëtimin tonë të përbashkët.

E ecja jonë duhet të vazhdojë.

Deri atëherë kur përfaqësimi ynë të jetë i merituar, trajtimi i ynë të jetë i barabartë, kur pasivizimi i adresave t’i takojë të kaluarës, njohja e diplomave të mos jetë pengesë e punësimit, simbolin kombëtar ta përdorim lirshëm e librat të mos i mungojnë nxënësve.

Ne duhet të ecim drejtë përpjekjeve tona për të siguruar zhvillimin e komunave ku jetojmë, të jemi bashkë rreth temave me rëndësi kombëtare e të konkurojmë me ide e program për zhvillimin tonë lokal.

Prandaj, duke uruar që 31 vjetori i Partisë për Veprim Demokratik të jetë vetëm një pjesë e angazhimit tonë politik, ftoj edhe të gjithë anëtarët e anëtaret e dikurshëm e PVD-së të kthehen në familjen tonë politike.

Të rinjët dhe të rejat ambicioze e të vendosura të na bashkëngjiten.

Të vazhdojmë të qëndrojmë drejtë, të rritemi edhe më shumë e të kontribuojmë të gjithë bashkë.

Urime!

Leave a Reply

Your email address will not be published.