Hoxhaj me shtatë zotime për Luginën e Preshevës: Krijimin e Fondit prej pesë milionë eurove dhe dokumentacione të Kosovës (VIDEO)

I nominuari për kryeministër të Kosovës, nga rradhët e PDK-së, Enver Hoxhaj, gjatë një konference për media, sot, mes tjerash ka publikuar shtatë zotimet e Partisë Demokratike të Kosovës për shqiptarët e Luginës së Preshevës.

Hoxhaj, fillimisht ka deklaruar se, çdo marrëveshje përfundimtare me Serbinë, do të duhej të trajtojë si temë kyçe edhe çështjen e Luginës së Preshevës.

Për më shumë, kandidati për kryeministër ka premtuar se qeverisja e udhëhequr nga PDK, do të krijojë fondin e përhershëm prej pesë milionë eurove për kthimin e vullnetshëm të shqiptarëve të Luginës së Preshevës në trojet e veta dhe ndihmë arsimit dhe kultures shqipe në Luginë.

Hoxhaj, ka bërë të ditur se, lista e Partisë Demokratike të Kosovës, do të ketë edhe dy përfaqësues nga Lugina e Preshevës, që do të jenë zëri i fuqishëm i shqiptarëve të Preshevës, në Kuvendin e Kosovës.

Ja cilat janë shtatë zotimet e PDK-së për Luginën e Preshevës:

1. Dy përfaqësues nga Lugina e Preshevës në listën për deputetë,

2. Ligji për mbështetjen e shqiptarëve në Luginën e Preshevës,

3. Themelimi i Agjencisë Shtetërore për Luginën e Preshevës,

4. Pajisja me letërnjoftim dhe pasaportë të Republikës së Kosovës,

5. Rritja e kuotave dhe krijimi i kuatova të reja për studentët nga Lugina

6. Hapja e katër pikave të reja kufitare me Luginën e Preshevës,

7. Krijimi i Fondit të përhershëm prej 5 milionë eurosh për riatdhesimin e shqiptarëve të Luginës.

Më poshtë, mundë të ndjekni të plotë konferencën e kandidatit për kryeministër nga PDK, Enver Hoxhaj: